الإثنين , نوفمبر 19 2018
الرئيسية / خرافات طب عضوي / مرض السكر ، وراثة أم عادات خاطئة ؟
مرض السكر و اسباب مرض السكر

مرض السكر ، وراثة أم عادات خاطئة ؟

قبل ما نقول إن مرض السكر وراثة، وناخد راحتنا في الأكل، لازم نعرف أنواع مرض السكر وأسبابه، وقبل ما نقول إنه بيجي في السن الكبير بس لازم ناخد بالنا كويس ونعرف اعراض مرض السكر وعوامل الخطورة اللي بتدقلنا ناقوس الخطر.
وخاصة لما إحصائيات منظمة الصحة العالمية تقول إن معدل انتشار مرض السكر عالميًا من سن 18 سنة ارتفع من 4.7% في عام 1980 إلى 8.5% في عام 2014.

 

  •  ما هو مرض السكر
  •  انواع مرض السكر
  •  اعراض مرض السكر النوع الأول
  •  مضاعفات مرض السكر النوع الأول
  •  اسباب مرض السكر من النوع الأول
  •  عوامل الخطورة النوع الأول
  •  الوقاية وعلاج مرض السكر من النوع الأول
  •  اعراض مرض السكر النوع التاني
  •  اسباب وعوامل خطورة مرض السكر النوع التاني
  •  مضاعفات مرض السكر من النوع التاني

 

ما هو مرض السكر ؟

هو حالة مزمنة ترتبط بارتفاع غير طبيعي في مستويات السكر (الجلوكوز) في الدم. الموضوع بيبدأ من أول قطمة أكل تدخل بوقك لحد ما الأكل يوصل لمعدتك، تبدأ المعدة تحول الأكل (الدهون والكربوهيدرات) لسكر، السكر أو الجلوكوز، واللي ظهوره في الدم بيعلن هنا بدء دور البنكرياس في إفراز الأنسولين لتكسير الجلوكوز ده وتحويله لطاقة.
لكن في أوقات تانية مش كل السكر بيتحول لطاقة، وبيفضل زايد في الدم وده كدة بيكون بداية مرض السكر، يعني مرض السكر هو عبارة عن ارتفاع نسبة السكر في الدم.


لكن ايه سبب ارتفاع نسبة السكر في الدم؟
وظيفة الأنسولين اللي بيفرزه البنكرياس هى خفض مستوى السكر في الدم، بالتالي غياب أو عدم كفاية إنتاج الأنسولين، أو عدم قدرة الجسم على الاستخدام السليم للأنسولين يسبب مرض السكر.

انواع مرض السكر


في سببين أو ممكن نقول نوعين لمرض السكر :

  • النوع الأول

    النوع الأول بيحصل لما الجسم يعاني من غياب الأنسولين يعني البنكرياس مبينتجش أنسولين أصلًا! وزي ما قولنا إن عدم وجود الأنسولين اللي بينتجه البنكرياس بيسبب زيادة نسبة السكر في الدم.

     

    طيب ليه ممكن البنكرياس ميفرزش الانسولين ؟!ليه البنكرياس ميفرزش الانسولين

    خلينا الأول نعرف إن البنكرياس عبارة عن مجموعة خلايا، الحقيقة إنها ملايين من الخلايا منها مجموعات خلايا رئيسية دورها تنظيم مستويات الجلوكوز في الدم.
    كل نوع من الخلايا دي بيفرز نوع مختلف من الهرمونات اللي بتنظم مستوى الجلوكوز في الدم، وخلايا بيتا هى اللي بتفرز الانسولين
    اللي بيحصل إن خلايا بيتا دي ممكن تموت نتيجة إصابة في الجهاز المناعي للجسم واللي بيبدأ يهاجم الخلايا، فبالتالي مبقاش في انسولين في الجسم لتكسير الجلوكوز.


    مين اللي ممكن يصاب بالنوع الأول من مرض السكر؟

    عادة النوع الأول من مرض السكر بيصيب سن أقل من 20 سنة، يعني الأطفال والشباب مش كبار السن بس، ونسبة المصابين بالنوع الأول من مرض السكر 5% من  نسبة المصابين بمرض السكر.

     

  • النوع الثاني

    النوع التانى من مرض السكر بيقاوم الأنسولين وبيخلى الجسم مش قادر يتعامل مع السكر الموجود فى الدم، على الرغم من إن البنكرياس بيكون شغال كويس وبيفرز الأنسولين!
    هنشوف ده ليه ممكن يكون بيحصل بعد ما نتكلم عن اسباب النوع الأول واعراضه ومضاعفاته وعلاجه.



    اعراض مرض السكر من النوع الأول

    اعراض مرض السكر من النوع الأول غالبا ما بتكون خفية، وممكن متاخدش بالك منها أو تتعامل معاها إنها حاجة عادية في حين إنها ممكن تبقى عوامل خطورة بتنبهك ببداية مرض السكر، علشان كدة مهم إنك تاخد بالك من العلامات دي:

  1. لو بتحس بعطش شديد وريقك بينشف بسرعة.
  2. لو بتحس إنك جعان دايمًا حتى بعد ما تاكل.
  3. بتخس وبتفقد وزن ملحوظ، على الرغم من إن شهيتك مفتوحة وبتاكل على طول.
  4. الشعور بالتعب المستمر والوهن، وإنك معندكش طاقة ومش قادر تعمل حاجة.
  5. لو بتدخل الحمام كتير، بس خد بالك إن طبيعي لو بتشرب مياه كتير تدخل الحمام كتير، لكن لو لاحظت دخول الحمام بشكل متكرر وملحوظ من غير سبب، يبقى هنا فيه مشكلة.
  6. مشاكل في البشرة زي الالتهابات المتكررة في الجلد والالتهابات الفطرية أو العدوى البكتيرية.
  7. لو لاحظت إن ريحة فمك مش حلوة، واستمر ده معاك لفترة طويلة مع ظهور باقي الأعراض التانية، فأنت محتاج تكشف وتحلل علشان تطمن.


    احنا مش بنقولك الكلام ده علشان تخاف بالعكس، العلامات والأعراض دي بتظهر في البداية وممكن لو خدت بالك منها وبدأت في العلاج، يحميك من إنك توصل لمراحل متأخرة من مرض السكر ومن المضاعفات لقدر الله اللي زي دي:


    مضاعفات مرض السكر  

  • أمراض القلبمن مضاعفات مرض السكر ، امراض القلب
    مرض السكر بيزيد من إحتمالية الإصابة بمشاكل القلب؛ زي الذبحة الصدرية، والنوبة القلبية، وارتفاع ضغط الدم وغيرها، خاصة عند الإهمال في علاج مرض السكر.
  • فشل كلوي
    تحتوي الكلي على ملايين من الأوعية الدموية الصغيرة اللي بترشح النفايات من الدم، وللأسف مرض السكر ممكن يأثر على نظام الترشيح واللي بيسبب تلف شديد للكلى يؤدي إلي فشل كلوي تام.
  • مشاكل في الرؤية والعين
    مرض السكر ممكن يسبب تلف الأوعية الدموية في الشبكية (اعتلال الشبكية السكري) وده ممكن في النهاية يتسبب في الإصابة بالعمى. كمان بيزيد مرض السكر من خطر الإصابة بظروف الرؤية الخطيرة الأخرى، زي إعتام عدسة العين والمياه الزرقا.
  • تلف الأعصاب
    ارتفاع نسبة السكر في الدم ممكن يصيب جدران الأوعية الدموية (الشعيرات الدموية) اللي بتغذي الأعصاب، تلف الأعصاب هو أحد مضاعفات مرض السكر
    خاصة في الساقين، ويسبب الإحساس بالوخز أو التخدير أو الألم وبيبدأ عادةً عند أطراف الأصابع وينتشر تدريجيًا إلى الأعلى. وممكن 
    كمان عدم السيطرة على السكر المرتفع بالدم بشكل سيء إلى فقدان كل الإحساس بالشعور في الأطراف المصابة.
  • أمراض اللثة والفم
    نتيجة إهمال مريض السكر للعلاج، مناعته بتضعف وبيكون عُرضة لأمراض أكتر وعرضة للإصابة بالعدوى البكتيرية والفطرية في الفم والجلد، وبالتالي أمراض اللثة والفم…

    اسباب مرض السكر من النوع الأول

    من شوية اتكلمنا عن خلايا بيتا المسئولة عن إفراز الأنسولين في الجسم، وقولنا إن سبب حدوث النوع الأول من مرض السكر هو موت خلايا بيتا وتوقفها عن إنتاج الأنسولين وغياب الأنسولين في الجسم اللي بدوره بيقوم بتكسير الجلوكوز في الدم.

    لكن ليه خلايا بيتا ممكن تموت ؟

    الجهاز المناعي للجسم بيتعامل مع خلايا بيتا على إنها جسم غريب عن الجسم عن طريق الخطأ، ويهاجمها ويدمرها. الأطباء ميعرفوش ايه اللي ممكن يسبب الحالة دي وقالوا إن سبب المشكلة يرجع لعوامل وراثية أو التعرض لفيروس معين وعوامل بيئية بتحفز الجهاز المناعي على مهاجمة البنكرياس…


    عوامل الخطورة

    عوامل الخطورة هى العوامل اللي لو موجودة بتزيد من نسبة وخطر الإصابة بالمرض، وبالنسبة للنوع الأول من مرض السكر، هى بتشمل:

    • التاريخ العائلي، يعني لو والدك أو والدتك أو أخوك أو حد من أجدادك كان مصاب بالنوع الأول من مرض السكر، فأنت نسبة احتمال الإصابة بيه.
    • مش بس التاريخ العائلي اللي يثبتلك، كمان بعض الجينات الوراثية لو موجودة عندك تزيد من خطر الإصابة بمرض السكر.
    • في كمان عوامل بيئية معينة بتعتمد على المكان ولكنها غير معروفة وغير محددة.
    • مرض السكر من النوع الأول كمان ممكن يظهر في أي سن حتى عند الأطفال.

      علاج مرض السكر من النوع الأول

      دايمًا بيشمل علاج مرض السكر مش بس العلاج الدوائي، لكن مع المحافظة على نظام غذائي وحياتي باستمرار.

      أول حاجة العلاج، وهو عبارة عن تناول جرعات الانسولين لتعويض نقص الانسولين وبالتالي تنظيم مستوى السكر في الدم.
      الهدف هو الحفاظ على مستوى السكر في الدم أقرب ما يكون إلى طبيعته قدر الإمكان لتأخير أو منع حدوث مضاعفات، علشان كدة بجانب العلاج لازم يكون في مراقبة متكررة لمستوى السكر في الدم، والالتزام بالنظام الغذائي والرياضة

      نظام غذائي متوازنومفيش حد يقدر ينكر أهمية الرياضة عمومًا ولمريض السكر خصوصًا، لكن المريض بالنوع الأول من مرض السكر محتاج إنه يعرف شوية حاجات قبل ما يبدأ رياضة، على سبيل المثال :-

  • يقيس نسبة السكر فى الدم قبل ما يلعب رياضة.
  • ياكل وجبة خفيفة قبل وبعد ما يلعب رياضة.

    أما عن جزئية التغذية، فمفيش حاجة اسمها أكل ممنوع (الكلام ده للنوع الاول) … لأن مريض السكر مسموح له ياكل أى نوع من الأكل حتى السكريات، لكن طبعًا لازم يتظبط بنظام غذائى متوازن .النوع التاني من مرض السكر زي ما قولنا في النوع التاني إن الجسم بيقابل مشكلة في التعامل مع الأنسولين اللي بيفرزه البنكرياس، الجسم بيقاوم البنكرياس وبيمنعه من وظيفته اللي هى تكسير الجلوكوز وتحويله لطاقة.

    اعراض مرض السكر من النوع التاني

    اعراض النوع التاني بتشبه إلى حد كبير النوع الأول زي:

  • إنك بتحس بالعطش أوقات كتير
  • لو بتدخل الحمام أوقات كتير برضه، على غير الطبيعي.
  • إنك تحس بتخدير أو رعشة في أطراف إيدك أو رجلك
  • لو اتعورت، بتلاحظ إن الجرح بياخد وقت كبير علشان يلتئم.
  • العدوى الفطرية المتكررة في الفم والمسالك البولية.


    طيب مقاومة الجسم للأنسولين ممكن تحصل بسبب ايه؟

    اسباب مرض السكر من النوع التاني وعوامل خطورته


    أسباب الإصابة بالنوع التاني من مرض السكر وعوامل خطورة وإحتمالية الإصابة بيه كتير ومعروفة على عكس النوع الأول منها اللي بيرجع لكبر السن 45 أو أكثر ولأسباب وراثية والتاريخ المرضي لعيلتك، ومنها أسباب متعلقة بعادات خاطئة أو أمراض تانية زي:

  • التدخين
  • تناول الأطعمة اللى فيها نسبة دهون عالية (زى الوجبات السريعة)
  • زيادة الوزن أو السمنة
  • ارتفاع ضغط الدم، حتى لو بيتم السيطرة عليه وعلاجه لكن هو من مسببات مرض السكر
  • أمراض القلب والأوعية الدموية
  • ارتفاع نسبة الكوليسترول والدهون الثلاثية في الجسم.
  • الاكتئاب
    الاكتئاب ممكن يؤدي إلى أسلوب حياة سيئ، مثل الأكل غير الصحي، والتدخين، وزيادة الوزن، وكلها عوامل خطر لمرض السكري.


    وبالنسبة للنساء، ممكن الحامل تصاب بمرض السكر خلال فترة الحمل، ولو ده حصل بيكون فيه احتمال كبير انها تُصاب بعد الحمل بمرض السكر المزمن، علشان كدة بيكون ضروري إنها تتابع مع دكتور طول فترة الحمل.



    مضاعفات مرض السكر من النوع التاني

    مضاعفات مرض السكر من النوع التاني هى نفس مضاعفات النوع الأول، من تأثير على أجهزة الجسم المختلفة وتلف للأعصاب وغيرها.

    علاج مرض السكر من النوع التاني


    مهم جدًا الحفاظ على نسبة السكر في الدم للتقليل من التعرض للمضاعفات، وده من خلال الحفاظ على نظام غذائي صحي والرياضة بجانب العلاج الدوائي اللي بيحدده الدكتور حسب الحالة وطبيعة الجسم واستجابته


    أغذية عليك تجنبها


    النوع الثانى من مرض السكر هو الأشهر والأكثر انتشارًا، وطرق الوقاية منه هو الابتعاد عن أسباب الإصابة بيه، زي الابتعاد عن التدخين والوجبات السريعة والأغذية غير الصحية بقدر الإمكان واللي بترفع نسبة السكر في الدم زي:

  • الأرز الأبيض لأنه بيحتوي على كميات قليلة من الألياف، خاصة بالمقارنة مع الأرز البني لأن وجود الألياف بيساعد في الحفاظ على استقرار مستويات السكر في الدم.
  • الأرز الأبيض والأرز البني - العيش الأبيض والعيش البنيالعيش الأبيض، لأن الجسم بيستوعب وبيهضم بسرعة المنتجات المصنوعة من الدقيق المكرر، وبالتالي الهضم السريع ده ممكن يؤدي إلى ارتفاع نسبة السكر في الدم، وكذلك المكرونة والمعجنات.
  • المشروبات الغازية ومشروبات الطاقة بتحتوي على نسبة عالية من السكر.
  • الوجبات السريعة لأن معظم الوجبات السريعة بتحتوي على نسبة عالية من الدهون والسعرات الحرارية والملح، وكلها تزيد من خطر الإصابة بالنوع الثاني من مرض السكر ، وترفع مستوى السكر في الدم.تجنب الوجبات السريعة
  • الشيبسي والمخبوزات المُغلفة واللي بنسميها وجبات خفيفة أو سناكس، لأنها بتحتوي على نسب عالية من الدهون غير المشبعة، والدهون غير المشبعة بترفع الكولسترول السيئ وبتقلل الكولسترول الجيد في الدم، مما قد يؤدي إلى الإصابة بمرض السكر. حتى الكميات الصغيرة من الدهون المتحولة ممكن يكون له تأثيرات صحية سلبية.
  • الخضروات المعلبة أو المطبوخة بكمية كبيرة من الزبدة، وكذلك المخللات الحد منها لو كنت تعاني من ارتفاع الضغط.
  • اللحوم المقلية، أو عالية الدهون.


    أغذية عليك تناولها

    سواء أنت مصاب بمرض السكر أو لا، مهم إنك تلتزم بالرياضة لمدة 30 دقيقة يوميًا، وتحدد لنفسك نظام غذائى صحي وتناول الأغذية اللي بتقلل من نسبة السكر في الدم زي:
    نظام غذائي صحي لتجنب مرض السكر

  • الحبوب الكاملة زي الأرز البني والشوفان، وأي حاجة معمولة من الحبوب الكاملة ومن غير سكر

  • الخضروات وتسويتها على البخار أو مشوية، والخضار خاصة زي اللفت والسبانخ والجرجير.
  • البروتينات النباتية، زي الفول والمكسرات.
  • السمك، والمأكولات البحرية عمومًا.
  • الفراخ والبيض، ومنتجات الألبان قليلة الدسم.

 

لو قريت المقالة دي وعرفت معلومات أول مرة تعرفها عن مرض السكر ، احكيلنا ناوي تغير ايه في نظام حياتك علشان تحمي نفسك من مرض السكر ؟
ولو أنت مصاب بمرض السكر قوللنا ايه النظام الغذائي اللي منتظم عليه ؟

شاهد أيضاً

علاج دوالي الساقين بالاعشاب ، حقيقة أم خرافة ؟

علاج دوالي الساقين بالاعشاب ، حقيقة أم خرافة؟

علاج دوالي الساقين بالاعشاب ، هل ممكن يكون طريقة فعّالة و علاج طبيعي لدوالي الساقين ؟ دوالي …

اعراض ارتفاع الضغط

قبل ما نبدا الكلام فى موضوع  اعراض ارتفاع الضغط  .. خلينى اقولك ان ضغط الدم …

طرق علاج دوالي الساقين

الدليل الكامل لـ علاج دوالي الساقين

الدليل ده هيساعدك تعرف كل حاجة عن علاج دوالي الساقين ؛ عن أصل المشكلة وحلها، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *