الإثنين , نوفمبر 19 2018
الرئيسية / خرافات طب عضوي / أشهر 10 خرافات عن مرض السكري النوع الاول
خرافات عن مرض السكري من النوع الاول

أشهر 10 خرافات عن مرض السكري النوع الاول

نسبة مرضى السكري النوع الاول هى من 5%-10% من مرضى السكري عمومًا، ويعتبر مرض السكري من النوع الاول من الأمراض اللي كتير من الناس مش فاهماها…
عدم فهمك لمرض بيخليك تتخيل حاجات غلط ومش حقيقة عنه، وده اللي حاصل فعلًا كتير مننا مش فاهم تعقيدات مرض السكري ، واد ايه أفكار كتير غلط منتشرة عن مرض السكري النوع الاول عن طريق الخرافات والمفاهيم الغلط. ومهم جدًا فضح الخرافات وتكذيبها ومشاركة الحقائق عن مرض السكري النوع الاول ، علشان ده بيساعد المريض أولًا إنه يعيش في بيئة تتفهم حالته أو على الأقل متنقلش ليه أفكار غلط ممكن تأذيه لو مش جسديًا فنفسيًا.

تعالى نشوف دلوقتي ايه أشهر الخرافات المنتشرة حول مرض السكري النوع الاول والحقائق اللي وراها…

 

1.الأشخاص المصابة بمرض السكري النوع الاول ممنوع ياكلوا سكر نهائيًا

مرض السكري ونظام غذائي شاملالحقيقة إن مرضى السكري النوع الاول ممكن ياكلوا أي حاجة عايزينها، طالما إنهم بياخدوا انسولين لتغطية كمية السكر أو الكربوهيدرات اللي بياكلوها. وعمومًا لازم نقول إن تناول كميات كبيرة من السكر أو المواد الغذائية اللي بتتحول لسكر في الدم زي الكربوهيدرات، مش صحي لأي شخص ولازم يكون في اعتدال في تناولها.

 

2. السمنة سبب أساسي من اسباب مرض السكري النوع الاول

مرض السكري النوع الاول هو مرض مناعي ذاتي، يسبب مهاجمة الجسم للبنكرياس على إنه جسم غريب، واللي بيؤدي إلى موت خلايا بيتا المسئولة عن إفراز الانسولين، وبيبدأ الجسم يعاني من غياب الانسولين -المسئول عن تكسير السكر في الدم واستخدامه لصالح الجسم وتحويله لطاقة- وبتكون النتيجة ارتفاع نسبة السكر في الدم بشكل مرضي يتطلب علاج.
بالتالي الإصابة بمرض السكري النوع الاول ملوش علاقة بزيادة الوزن أو أي نظام غذائي يتبعه الجسم. 

 

3. مرض السكري النوع الاول لا يصيب البالغين وكبار السن

غالبًا بيصيب مرض السكري النوع الاول الأطفال ، لكن ده ميمنعش إن في حالات حصلت لبالغين وكبار في السن، وإن مرض السكري النوع الأول يمكن الإصابة بيه في أي سن.

4. الأطفال المصابين بمرض السكري النوع الاول بيخفوا منه لما يكبروا

مرض السكري عند الاطفال

للأسف مرض السكري لا يمكن علاجه بشكل نهائي، هو مرض مزمن يمكن التأقلم معه، والعلاج الوحيد والمستمر لمرض السكري النوع الاول هو جرعات الانسولين لتعويض نقص الانسولين في الجسم، مع نظام غذائي متوازن وممارسة الرياضة.

5. محليات السكر الصناعية مناسبة لمرضى السكري من النوع الاول

محليات السكر الصناعية و مرض السكري النوع الاول
مفيش أي سبب ممكن يخلينا نستخدم محليات السكر الصناعية وإدخالها في النظام الغذائي لأي طفل، وخاصة مريض السكري النوع الاول. بالعكس كمان ممكن محليات السكر الصناعية تكون مضرة وتؤثر على عمل الانسولين بشكل فعَال.

6. مرض السكري النوع الاول مرض وراثي!

مرض السكري النوع الاول وراثي أم لا
بس هو معروف إنه مرض وراثي! النقطة دي معقدة شوية بس هنحاول نبسطها…

الإصابة بمرض السكري النوع الاول مش شرط تكون بسبب إن في واحد في العيلة مصاب بالمرض، لكن ممكن جينات المناعة الذاتية الخفية -اللي ممكن تسبب مرض السكري ، أو أي مرض مناعي تاني- تكون موجودة واتورثت لحد ما ظهرت في أحد أفراد العيلة.

7. سبب من اسباب مرض السكري النوع الاول أكل كميات كبيرة من السكريات

مرض السكري النوع الاول والسكريات
زي ما قُلنا في النقطة رقم 2؛ مفيش أي حاجة ممكن تاكلها تسبب النوع الاول من مرض السكري حتى لو كانت اسلوب غذائي غلط بس هى مش من اسباب مرض السكري النوع الاول.

 

8. أصحاب مرض السكري النوع الاول مينفعش يلعبوا رياضة

مرض السكري النوع الاول والرياضة
بالعكس الرياضة عمرها ما كانت عائق أو سبب للأمراض أو تضاعفها، لكنها دايمًا بتكون سبب في الصحة السليمة طول ما بنمارسها بالشكل المظبوط.

وفي كتير من الرياضيين المصابين بالسكري من النوع الأول زي جاري هول السباح الفائز بالميدالية الذهبية في أولمبياد صيف سنة 2000، ولاعب كرة السلة الأمريكية آدم موريسون.


9. مضخة الانسولين بتعالج مرض السكري النوع الاول بشكل نهائي

باختصار مضخة الانسولين هى عبارة عن جهاز الكتروني صغير بحجم الموبايل يمكن حمله في الجيب، وموصل بأنبوبة رفيعة ملصقة في البطن لتوصيل الانسولين إلى الجسم حسب احتياجاته، وهى وسيلة بتساعد في مراقبة مستويات السكر في الدم وتجنب الهبوط المفاجئ أو الارتفاع عن احتياج الجسم، وكمان لمرونة استخدام الانسولين على مدار اليوم بكمية تتطابق بشكل كبير مع احتياجات الجسم بدل الحقن المتكرر
علاج السكري النوع الاول

بالتالي مضخة الانسولين من الأدوات اللي سهلت العلاج والتأقلم مع المرض، لكنها مش هتعالج مرض السكري بشكل نهائي، هى بس خلت توصيل الانسولين للجسم أسهل وبشكل أدق.


10. يمكن علاج مرض السكري النوع الاول بالرياضة والنظام الغذائي بس


الرياضة والنظام الغذائي مهمين جدًا لجسم أقوى ولصحة أفضل للوقاية من الأمراض، لكن مينفعش نقول إنهم لوحدهم علاج للأمراض. وللأسف مرض السكري ملوش علاج بشكل نهائي.

 

الخلاصة

الخرافات المنتشرة كتير وخاصة حول الأمراض، ودورنا إننا نفهم ونعرف الحقيقة، لو عايز تعرف وتفهم أكتر عن حقيقة مرض السكري اقرأ المقالة دي.

ملخص

شاهد أيضاً

اعراض ارتفاع الضغط

قبل ما نبدا الكلام فى موضوع  اعراض ارتفاع الضغط  .. خلينى اقولك ان ضغط الدم …

مرض السكر و اسباب مرض السكر

مرض السكر ، وراثة أم عادات خاطئة ؟

قبل ما نقول إن مرض السكر وراثة، وناخد راحتنا في الأكل، لازم نعرف أنواع مرض …

طرق علاج دوالي الساقين

الدليل الكامل لـ علاج دوالي الساقين

الدليل ده هيساعدك تعرف كل حاجة عن علاج دوالي الساقين ؛ عن أصل المشكلة وحلها، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *