الإثنين , نوفمبر 19 2018
الرئيسية / خرافات طب عضوي / خرافات دوالي الساقين / خرافة علاج دوالي الساقين بخل التفاح
علاج دوالي الساقين بخل التفاح

خرافة علاج دوالي الساقين بخل التفاح

علاج دوالي الساقين بخل التفاح واحدة من الطرق المنتشرة لـ علاج دوالي الساقين في المنزل ! هنتكلم في المقالة دي عن أصل مشكلة و مرض دوالي الساقين و اسباب دوالي الساقين وأعراضها ومضاعفاتها، وايه أصل خرافة علاج دوالي الساقين بخل التفاح .
لإنك لما تعرف كل ده، هتميز بنفسك بعد كدة ايه الحقيقة من الخرافة لأنك عرفت أصل المشكلة.

  • ما هي دوالي الساقين
  • اسباب دوالي الساقين
  • اعراض دوالي الساقين
  • مضاعفات دوالي الساقين
  • حقيقة علاج دوالي الساقين بخل التفاح
  • ٧ طرق للوقاية من دوالي الساقين


ما هى دوالي الساقين ؟
ما هى دوالي الساقين

ظهور العروق الزرقاء في الساقين بشكل واضح زى اللي في الصورة، هى أحد أهم علامات دوالي الساقين لأن في بعض الحالات بتكون العلامات ظاهرية بس زي العروق الزرقاء في الساقين و تورم القدمين أو تورم الساقين من الأسفل، من غير أي شعور بالألم واللي بيخلي المريض مياخدش باله من وجود دوالي الساقين ويتجاهل علاجها.


لكن ايه هى اسباب دوالي الساقين ؟

اسباب دوالي الساقين

ظهور العروق الزرقاء في الساقين أو تورم القدمين بيحصل نتيجة ضعف صمامات اوردة الساق ، واللي وظيفتها نقل الدم من أطراف الساق للقلب، وبالتالي ضعفها بيسبب تراكم وارتجاع الدم في اوردة الساق بدلًا من رجوعه للقلب، وكذلك توسع في الاوردة .
تراكم الدم في الأوردة بيظهر على شكل بقع متكونة من مجموعة شعيرات لونها أزرق أو أحمر، ومع الوقت بتتطور دوالي الساقين لتظهر على شكل عروق نافرة لونها أزرق أو بنفسجي غامق.
ما هى اسباب دوالي الساقين

طيب ايه أسباب حدوث ضعف وتلف صمامات اوردة الساق ؟

في أسباب كتير لضعف أو تلف الصمامات أو لحدوث توسع في الاوردة منها:

  • السن
    مع تقدم السن، بتبدأ صمامات الأوردة بالضعف مع مرور الوقت، وبالتالي زي ما قولنا ضعف الصمامات بيسبب تراكم الدم في اوردة الساق وتكّون دوالي الساقين
  • الاستعداد الوراثي
    التاريخ الوراثي للعيلة مع دوالي الساقين يعتبر عامل خطورة لأنه بيزود نسبة احتمالية الإصابة بدوالي الساقين. وبالتالي ضروري جدًا محاولة منع تكّون الدوالي والوقاية منها من خلال المحافظة على نظام حياتي صحي وده اللي هنتكلم عنه كمان شوية.
  • الحمل فيما يسمى دوالي الحمل
    مع مرور شهور الحمل وتزايد حجم الرحم، بيبدأ حجم الرحم يسبب ضغط إضافي على اوردة الساق للحامل، فبتظهر دوالي الساقين عند الحامل ، وكذلك التغيرات الهرمونية اللي بتحصل أثناء الحمل بتأثر على اوردة الساق وبتلعب دور في ظهور دوالي الحمل
    وعمومًا دوالي الساقين أو دوالي الحمل بتختفي بنسبة كبيرة بعد الولادة بفترة، وبترجع اوردة الساق لطبيعتها بدون أي تدخل أو بدون ما تحتاج لعلاج.
  • التغيرات الهرمونية
    التغيرات الهرمونية اللي بتحصل عند السيدات في فترات زي الحمل أو قبل الدورة الشهرية أو عند انقطاعها بشكل نهائي، بتأثر على الجسم ومنها الأوعية الدموية لأن الهرمونات الأنثوية وتقلبها بتأثر على جدران الأوعية الدموية وتسبب ضعفها، ومن ضمن الحاجات اللي بتاثر بشكل سلبي على صحة السيدات وبتخليها أكتر عرضة لظهور دوالي الساقين ، هى تناول علاجات الهرمونات البديلة وحبوب منع الحمل لأنها بتسبب كذلك تغيرات هرمونية في الجسم.
  • السمنة
    زيادة الوزن بتسبب كذلك ضغط على اوردة الساق بشكل مستمر.
  • الوقوف والجلوس لفترات طويلة وبشكل ثابت من غير تغيير وضع الرِجل ومع تكرار ده، بيأثر على جريان الدم في اوردة الساق بشكل سلبي.


لكن هل تأثير دوالي الساقين بيقف عند المظهر الخارجي للساقين فقط؟

اعراض دوالي الساقين

للأسف دوالي الساقين مش بس بتسبب ظهور علامات مزعجة في الرِجل، لكن بتسبب أعراض مؤلمة بينتج عنها صعوبة في ممارسة الحياة اليومية. ومن اعراض دوالي الساقين :

  • الم في الساق بتحسه في الحركة العادية، مع شعور بالثُقل خاصة بليل أو بعد مجهود.
  • العروق الزرقاء في الساقين أو بنفسجية اللون مش بس بيكون لونها ملحوظ، لكن بتبقى ملتوية ومنتفخة مع تورم الساقين
  • التهاب الساق وده بيكون عبارة عن التهاب في الجلد في المنطقة المصابة حوالين الدوالي ، وبيكون الجلد لونه أحمر وجاف وبيصاحبه حكة.
  • تورم القدمين أو تورم الساقين عند الكاحلين أو حسب الساق المصابة.
  • تشنجات عضلية في الساق خاصة عند الوقوف فجأة.
  • زيادة في الم الساقين بعد بذل مجهود مؤثر على الساق.
  • الم الساقين عند النوم أو في وقت الراحة، مما يعني إن الألم في الساق بيفضل مستمر حتى وقت الراحة مش بس بعد الوقوف أو بذل مجهود.

 مضاعفات دوالي الساقين

بجانب الأعراض الجانبية الكتير لدوالي الساقين، في كتير من المضاعفات اللي ممكن تحصل نتيجة إهمال علاج دوالي الساقين . المضاعفات دي نادرة بس لو حصلت، بتكون عادة تطورت بعد سنين من التشخيص الأولّي لمعظم المرضى.
بتختلف المضاعفات بشكل كبير في شدتها، لكن بعض الآثار ممكن تكون مميتة، زي احتمال حدوث انسداد رئوي نتيجة تجلط الأوردة العميقة في الساق!

مضاعفات دوالي الساقين وخطورتها

  • نزيف
    في حالات نادرة، المصابين بدوالي الساقين ممكن يعانوا من نزيف خارجي، نتيجة لتمزق الأوردة خاصة القريبة من سطح الجلد، وده بيسبب فقدان كميات كبيرة من الدم في وقت قصير خاصة مع ارتجاع الدم للخلف من الوريد المصاب.

 

  • جلطة الساق
    بتتكون جلطة الساق نتيجة لالتهاب اوردة الساق والمعروف باسم التهاب الوريد الخثاري ، وغالبًا اعراض جلطة الساق بتنعكس بألم على المصاب و تورم الساقين مكان الجلطة واحمرار الجلد والشعور بالسخونة مكانها نتيجة الالتهاب. في بعض الحالات، ممكن تتشكل جلطات الدم في الأوردة العميقة للساق، وده خطر جدًا لأنه ممكن يسبب انتقال جلطة الساق لأي مكان في الجسم زي الرئة ويكون نتيجتها الانسداد الرئوي!
    لكن تطور جلطة الساق من الأوردة السطحية هى الأكتر انتشارًا، وممكن توصل حالة واحدة من كل 5 حالات إلى جلطة في الوريد العميق في الساق. ولو اشتبه في الإصابة بجلطات الأوردة العميقة، لازم يلجأ المريض بسرعة إلى العلاج الطبي المناسب لتقليل الخطورة.

 

  • قرحة الوريد
    بتسبب دوالي الساقين قرحة في الساق ، بسبب زيادة الضغط الوريدي في أسفل الساقين، نتيجة لتراكم السوائل تحت الجلد وتسبب في تضخم المنطقة وتكون القرحة، وغالبًا بتكون بالقرب من الكاحلين.
    وفي معظم الحالات، لو حصل إصابة مكان القرحة حتى لو خدش بسيط مثلًا بتاخد وقت أطول للشفاء، بسبب عدم كفاية تدفق الدم إلى المنطقة المسئولة عن التسبب في الإصابة بالقرحة.

خرافة علاج دوالي الساقين بخل التفاح

خل التفاح هو منتج من الطبيعة مش مُضرّ واستخداماته ممكن تبقى مفيدة فعلًا، وتدليك الجسم بخل التفاح ممكن يساعد في تحفيز تدفق الدم وتحسن الدورة الدموية. وتدفق الدم بشكل طبيعي هيقلل -لو في- أي تورم أو انتفاخ في الساقين ، بالتالي علاج دوالي الساقين بخل التفاح تكمن خرافته في إن خل التفاح مش بيساعد في علاج أصل المشكلة!

ليه بنقول إن علاج دوالي الساقين بخل التفاح خرافة ؟
علاج دوالي الساقين بخل التفاح ، هل هو علاج طبيعي لدوالي الساقين ؟

لأن زي ما قولنا عن اسباب دوالي الساقين إنها بترجع لوجود ضعف في اوردة الساق أو صمامتها، أما استخدام خل التفاح مثلًا هيساعد في التقليل والتخفيف من حدة اعراض دوالي الساقين زي تورم القدمين أو الساقين، لكن للأسف مش هيعالج أصل المشكلة!
لكن ممكن نعتبره طريقة للوقاية من دوالي الساقين ، من خلال تدليك الساقين بخل التفاح بشكل يومي. لو عايز تعرف عن طرق علاج دوالي الساقين الصحيحة اقرأ المقالة دي.

وفي طرق تانية ممكن تلتزم بيها وتساعدك في الوقاية من دوالي الساقين قبل حدوثها زي:

٧ طرق للوقاية من دوالي الساقين

بما إن الوراثة والهرمونات بتلعب دور كبير في تكّون دوالي الساقين ، علشان كدة مش دايمًا ممكن نمنع ظهورها، لكن نقدر نقلل نسبة احتمالية الإصابة بيها من خلال الالتزام ببعض الروتين اليومي زي:

  1. ممارسة التمارين الرياضية بانتظام لتحسين الدورة الدموية وتسهيل تدفق الدم إلى القلب.
  2. تجنب إنك تحط رجل على رجل خاصة لو لفترات طويلة، لأن ده بيقلل تدفق الدم بشكل طبيعي في اوردة الساقين
  3. تجنب الوقوف والجلوس لفترات طويلة، والالتزام باستراحات مشي متكررة لتحفيز تدفق الدم في الساقين وفي كل أجزاء الجسم.
  4. اتباع نظام غذائي وممارسة الرياضة للحفاظ على وزن صحي
    طرق الوقاية من دوالي الساقين

  5. لبس الشرابات الضاغطة ، واللي بتوفر ضغط خفيف على اوردة الساقين ، بالتالي بتشجع تدفق الدم للرجوع إلى القلب. لكن في الحالة دي لازم استشارة الطبيب لأن في أنواع كتير للشرابات الضاغطة وحسب الحالة، الدكتور بينصح بيه حسب حالتك أو لو في بدايات ظهور الدوالي
  6. تجنب الملابس الضيقة جدًا حوالين الوسط، والفخذ، وأعلى الساق، لأن ده بيعيق تدفق الدم للقلب.
  7. تقليل كمية الملح في الأكل لأنها بتأثر بشكل مباشر على الأوردة. لأن زيادة نسبة الصوديوم في الجسم ممكن يسبب احتباس المياه في الجسم، والنتيجة ضغط إضافي على ضغط الدم وبالتالي ممكن يسبب تضخم و توسع في الاوردة


الخلاصة

دايمًا الوقاية بتيجي قبل العلاج، ولو محتاج فعلًا تحافظ على صحتك من الأمراض ابعد نفسك عن أسبابها وعيش حياة صح خالية من العادات الصحية الغلط. ولو عايز تعالج نفسك صح وتنقذها من مضاعفات الأمراض الخطيرة، افحص نفسك عند الطبيب واعرف طرق العلاج الصحيحة والمناسبة لحالتك.
لو محتاج تعرف أكتر عن طرق علاج دوالي الساقين الطبية متنساش تقرا المقالة دي.

 

ملخص
خرافة علاج دوالي الساقين بخل التفاح
أسم المقالة
خرافة علاج دوالي الساقين بخل التفاح
الوصف
علاج دوالي الساقين بخل التفاح ، خرافة كشفها يحمل كتير من الحقائق حول علاج دوالي الساقين و اسباب دوالي الساقين ، اعرف أكتر من هنا
الكاتب
أسم الناشر
مدونة خرافات
لوجو الناشر

شاهد أيضاً

اعراض ارتفاع الضغط

قبل ما نبدا الكلام فى موضوع  اعراض ارتفاع الضغط  .. خلينى اقولك ان ضغط الدم …

مرض السكر و اسباب مرض السكر

مرض السكر ، وراثة أم عادات خاطئة ؟

قبل ما نقول إن مرض السكر وراثة، وناخد راحتنا في الأكل، لازم نعرف أنواع مرض …

طرق علاج دوالي الساقين

الدليل الكامل لـ علاج دوالي الساقين

الدليل ده هيساعدك تعرف كل حاجة عن علاج دوالي الساقين ؛ عن أصل المشكلة وحلها، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *