الإثنين , نوفمبر 19 2018
الرئيسية / خرافات الرجيم / رجيم الماء : هل هو طريقة فعالة لإنقاص الوزن ؟
رجيم الماء

رجيم الماء : هل هو طريقة فعالة لإنقاص الوزن ؟

لو دخلت على المقالة دى دلوقتي، يبقي أنت بتعاني من مشكلة زيادة الوزن وعاوز تخس مش أقل من 10 كيلو فى الشهر، وأكيد سمعت عن رجيم الماء وإنه من أسرع الطرق لإنقاص الوزن الزائد فى الجسم. وفي الحالة دى يبقى أكيد أنت عاوز تعرف تفاصيل أكتر عنه  😉

في المقالة دى هنكلمك عن كل تفاصيل رجيم الماء السريع

1- ما هو رجيم الماء ؟

2- طريقة عمل رجيم الماء

3- هل رجيم الماء صحي ؟

4- مميزات رجيم الماء

5- أنواع رجيم الماء

6- رجيم الماء مع الاكل

7- رجيم الماء فقط بدون اكل

8- رجيم الماء البارد

9- رجيم الماء والليمون

10- نصائح و تحذيرات عن رجيم الماء


و أنت بتقرأ المقالة دى هات إزازة ماية أشربها و أنت بتقرأ 😀


ما هو رجيم الماء ؟


الرجيم المائي زي أى نظام غذائي بتسمع عنه للتخسيس، الفرق بس إنه بيعتمد بشكل أساسي على شرب المياه بكميات كبيرة لإنقاص الوزن وده بيسموه رجيم الماء فقط  ، فى النظام ده بتاكل و بتشرب عادى لكن الحاجة الثابتة فى يومك هى شرب الماء بكميات كبيرة.

طريقة عمل رجيم الماء ؟

بيستخدم نظام الرجيم المائي لأنه بيعتمد على عدم احتواءه على أى سعرات حرارية ، وبالتالى لما بتشرب مياه كتير ده بيعمل على إذابة الدهون و طردها من الجسم،  وبالتالى ده بيؤدى إلى إنقاص الوزن بسرعة.

ده على عكس الوجبات السريعة الخفيفة اللى بتحتوى على سرعات حرارية عالية !

 

اللي بيحصل إن امتلاء المعدة بالمياه، بيوصلك لإحساس الشبع و إنك مش عاوز تاكل وده بيخلى عندك قلة شهية للطعام (لو أنت من النوع اللى بياكل كتير جدًا)

و بالشكل ده الرجيم المائي بيعمل على إنقاص الوزن من 4 لـ 7 كيلو فى الأسبوع، وعلشان كده بيقولوا عليه رجيم الماء السريع 😉

كمان نسبة الأكسجين فى الدم بتزيد لما الجسم بيكون مرتوي كويس بالمياه، والأكسجين عنصر رئيسي لحرق الدهون الموجودة فى الجسم، و علشان كده حرق الدهون بيقل لما بيعاني الجسم من نقص المياه.

 

طب و هو ياترى شرب الماء بكميات كبيرة ممكن يكون مُضّر للجسم ؟

هل رجيم الماء صحي ؟

الإجابة إنه صحي وغير مُضّر تمامًا للجسم، ده بشرط إنك تستخدمه بشكل ميضرّكش مع نظام غذائي سليم حسب كلام الطبيب اللي بتتابع معاه.

الماء هو عنصر ضروري لعملية الهضم و نقل البروتين و الكربوهيدرات إلى الدم و تمثيلهم غذائيًا، وكمان الماء بيعمل على نقل النفايات و السموم إلى خارج الجسم.

لازم تكون عارف إن الماء بيشكّل نسبة كبيرة جدًا من الجسم بتاعنا، ممكن نقعد أسبوع بحاله من غير أكل، بس مينفعش نقعد من غير المياه لأن ببساطة الماء بيكون 65% من جسم الإنسان!

وبيشكل 85% من وزن المخ  و 80% من الدم و 70% من العضلات.

و لو نقص بس 2% من كمية الماء المطلوبة لجسم الإنسان، وقتها بنحس بصداع و دوخة و صعوبة فى التركيز و لو بتشتغل/ى على كمبيوتر هتلاقى صعوبة فى انك تبص/ى فيه كتير.

هنقولك دلوقتى على مميزات شرب المياه بكميات كبيرة… 

مميزات رجيم الماء

1- التخلص من الصداع

2- الرجيم المائي يعمل على إذابة الدهون الموجودة داخل الجسم وبالتالى

3- الرجيم المائي لا يقوم على أى حرمان من الأكل، بتاكل/ى براحتك بس بتشرب/ى ماية كتيرة و بنظام معين.

4- الرجيم المائي مالوش أي آثار جانبية.

5- الرجيم المائي مش هيكلفك فلوس وتشترى أدوية، لأنه بيعتمد على شرب الماء بكميات كبيرة فقط !

6- الرجيم المائي مش بيعتمد على أى مواد كيميائية (يعنى هتخس بشكل طبيعى 100%)

7- نضارة البشرة و حيويتها رغم أنه رجيم مائي ، لكن شرب المياه كتير بيخلى البشرة تتمتع بالحيوية والنضارة.

8- الرجيم المائي بيساعد على التخلص من السموم الموجودة فى الجسم.

9- الرجيم المائي بيعمل على تقليل الانتفاخات، وده بسبب دخول الحمام بإستمرار.

10- في ناس بتعاني دايمًا من وجع في الجناب من تحت، وده بيكون بأسباب كتير منه نقص الماء من الجسم، و لو بتعمل الرجيم المائى ، فشرب المياه بكميات كبيرة هيخليك تتخلص من الوجع ده!

 

أنواع الرجيم المائي ؟

1- رجيم الماء مع الاكل

2- رجيم الماء فقط بدون اكل

3- رجيم الماء البارد

4- رجيم الماء والليمون

 

1- رجيم الماء مع الاكل

 

في النظام ده بتاكل كل اللي أنت عاوزه بس بكميات قليلة، وبتشرب قبل الاكل بنص ساعة من كوبايتين لـ 3 كوبايات مياه (لازم تشرب قبل الاكل بنص ساعة)

1- مثلًا لو أكلت شيكولاته مكونة من 3 قطع، تشرب قبل ما تاكلها بنص ساعة كوباية ماية كبيرة

2- لو هتاكل ساندوتش، يبقى تشرب قبل الاكل بنصف ساعة 4 كوبايات مياه

3- أما المياه الغازية، فـ دي بقى تشرب قبلها بنص ساعة نص لتر مياه

4- حبيت تاكل بيتزا 😀 3 قطع مثلًا، يبقى هتشرب 3 كوبايات مياه قبل الاكل بنص ساعة، وهكذا كل ما تكتر عدد قطع البيتزا

5- السلطة بالمايونيز و سلطة الكولسلو دى يتشربلها كوبايتين مياه

6- لو هتاكل أى حاجة فى طبق متوسط مهما كانت ايه هى الحاجة دي، تشربلها قبل الاكل بنص ساعة 4 أكواب مياه

 

متقلقش من شرب كمية المياه دى كلها 😀 ، الموضوع سهل و بسيط بس محتاج إنك تتعود عليه مش أكتر  😉 ، و دايماً فكّر نفسك بأهمية المياه و مميزات رجيم الماء مع الاكل

 

هل رجيم الماء مع الاكل له أضرار ؟

الإجابة لأ، لأن رجيم الماء مع الاكل بيخليك تاكل كل اللى أنت عاوزه و بتاخد كل العناصر الغذائية اللي جسمك محتاجها عكس الأنظمة اللي هنشرحها لك في النقط اللي جاية.

بس في كام حاجة لازم تحطها في دماغك وأنت بتعمل رجيم الماء مع الاكل :

مع أول أحساس بالشبع لازم تبطل أكل، يعنى متقولش حرام لازم أكمل الطبق للأخر 😀 ، ممكن تشيله فى التلاجة و تسخنه و تاكله بعدين أو لو عندك قطة أو كلب تديهم الأكل

الرجيم ده بيخسس من 4 كيلو لـ 7 كيلو فى أسبوعين

 

2- رجيم الماء فقط بدون اكل لخسارة الوزن !

 

والنوع ده من رجيم الماء بيعتمد على شرب الماء فقط من غير ما تاكل أى حاجة لمدة 5 أيام واليوم السادس بتاخده فرى (بتاكل وتشرب اللى أنت عاوزه)

و فى خلال الـ 5 أيام من رجيم الماء فقط بدون اكل ، بتاكل حاجات بسيطة جدًا زى الخس والخضار السوتيه و نوع واحد من الفاكهة، وتشرب لبن…

والنوع دا أحياناً بيقولو عليه رجيم الماء البارد  

 

اضرار رجيم الماء فقط بدون اكل لخسارة الوزن !!

في الحالة دي أنت بتحرم جسمك من أهم العناصر اللى هو محتاجها فى سبيل إنك تخس من 5 لـ 7 كيلو أسبوعيًا، هتقولى مش مشكلة و المهم إني أخس وخلاص، نظام رجيم الماء فقط بدون اكل بيكون شديد الفقر فى كل العناصر الغذائية و الفيتامينات اللي جسمك محتاجها لإنك بتقعد 5 أيام من غير أى نوع من البروتينات والدهون وعلشان صحتك تكون كويسة.

وممكن فى اليوم السادس (الفرى) إنك تاكل بشراهة كبيرة وكميات ضخمة من الاكل، فجسمك يكتسب كمية أكبر من الدهون

3- رجيم الماء والليمون 

 

الرجيم ده عامل زي أي نظام غذائي بتاخده فى عيادات التخسيس ، الدكتور بيكتبلك حاجات معينة بتاكلها، والأساسي فيها إنك قبل الاكل بتغلى ماء مع قشر الليمون و خلطهة مع عصير الليمون وبتشرب المحلول ده قبل كل وجبة

أما عن الاكل اللي بتاكله بالظبط في كل وجبة ده بقى الدكتور بيقولك عليه حسب كل حالة 😉


اضرار رجيم الماء والليمون :

النوع ده شبه نوع رجيم الماء فقط بدون اكل ، وله نفسه الأضرار و النتائج السلبية (رجيم تقليدي يفتقر لكثير من الفيتامينات اللي الجسم محتاجها)

 

تحذيرات عن نظام الرجيم المائى :

1- لو أنت بره البيت، خد بالك متشربش مياه بكمية كبيرة إلا لو في مكان لدخول الحمام، لأن ده هيخليك عاوز تدخل الحمام كل شوية.

2- اتأكد إن معندكش إصابات أو أمراض معينة تمنعك من شرب الماء بكمية كبيرة فى اليوم.

3- وأنت بتشرب الماء بكمية كبيرة فى يومك

4- شربك للمياه فقط من غير وجود أى عناصر غذائية تانية و فيتامينات، هيسبب الشعور بالإرهاق والتعب.

 

نصائح تخص رجيم الماء :

1- استبدل المشروبات الغازية بشرب المياه لأن المشروبات الغازية تحتوى على سعرات حرارية عالية.

2- تقليل نسبة تناول الملح يساعد في نجاح رجيم الماء ، لأن الأملاح اللي بناكلها زى المخللات، بيساعد الجسم على الاحتفاظ بالمياه، واللي بيخليه ميفقدش الوزن.

3- على أد ما تقدر، حافظ على تناولك للفاكهة و الخضراوات الغنية بالمياه زى البطيخ و الخس.

4- أوقات كتير بنحس إننا جعانين، بس بنطلع مش جعانين أو مش جعانين أوى 😀 ، فـ حافظ على شربك للمياه بصفة مستمرة لأنه هيخليك تتجاوز نوبات الجوع المزيفة.

5- إنك تمارس الرياضة سواء بتعمل رجيم مائي أو مبتعملش رجيم أصلًا، بيساعدك على إنك تحافظ على صحتك بشكل مستمر.

و لو حتى جربت تمشى كل يوم لمدة نص ساعة، فـ ده هيخليك تحرق الدهون وتتخلص من الترهلات بسرعة أكبر ، و كمان هتحس بالطاقة الإيجابية و الإنتعاش ^_^

 

وفي النهاية لازم تكون عارف إن أى نظام غذائي فى الدنيا ينفع رجيم ، بشرط إنك تبقى عارف جسمك محتاج ايه بالظبط وجسمك عنده زيادة فى ايه و تبدأ تنقص منه، وطبعًا الإستمرارية هى أهم حاجة 😉 ، يعنى لو جيت فى النص ووقفت مترجعش تندم و تقول أنا مش بخس ليه 😀

دلوقتى احكيلنا عن تجربتك مع الرجيم المائي 😉 ؟

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *