الإثنين , نوفمبر 19 2018
الرئيسية / خرافات طب عضوي / خرافات دوالي الساقين / دوالي الحمل ، هل تختفي بعد الولادة أم تستمر؟
دوالي الساقين في الحمل

دوالي الحمل ، هل تختفي بعد الولادة أم تستمر؟

دوالي الحمل بتظهر في صور متعددة منها دوالي الساقين ، ودوالي الرحم أو دوالي الحوض. بس احنا هنتكلم في المقالة دي بالأخص عن الدوالي اللي احتمالية ظهورها أكتر أثناء الحمل ؛ وهى دوالي الساقين وازاي بتظهر في فترة الحمل و اعراض دوالي الحمل وهل دوالي الحمل بتختفي فعلًا بعد الولادة؟ وازاي تحمي نفسك من دوالي الساقين اثناء الحمل ؟

 

  • ما هى دوالي الساقين
  • دوالي الحمل
  • اعراض دوالي الحمل
  • اسباب ظهور دوالي الساقين اثناء الحمل
  • هل دوالي الحمل تختفي بعد الولادة
  • طرق الوقاية من دوالي الحمل
  • خطورة الدوالي اثناء الحمل
  • علاج الدوالي بعد الولادة

 

ما هى دوالي الساقين ؟

ما هى دوالي الساقين
بشكل عام، دوالي الساقين هى أوردة منتفخة بشكل غير طبيعي، إحدي علامات وجودها هى العروق الزرقاء في الساقين ، والأوردة أو العروق الزرقاء بتكون أحيانًا متعرجة ونافرة لدرجة إنها بتظهر بشكل واضح على سطح الجلد.

أما دوالي الحمل

دوالي الساقين عند النساء خاصة، بتتكون لأسباب كتير وواحد من أسبابها هو الحمل، وفي كتير من النساء بتظهر عندها دوالي الساقين في الحمل لأول مرة، ومنهم اللي عندها استعداد، فبتبدأ أثناء الحمل تتطور وتزداد سوء.

دوالي الساقين عند الحامل
اعراض دوالي الحمل ممكن تكون مزعجة في شكلها بس من غير ما تسبب أي الم في الساق ، وأوقات تانية ممكن تسبب الم الساقين عند الحامل أو شعور بالحكة والحرقان، وبتسوء الأعراض في نهاية اليوم، خاصة لو وقفتي كتير…

اعراض دوالي الحمل

دوالي الحمل وأعراضها
من اعراض الحمل عمومًا، التورم؛ واللي بيحصل بسبب السوائل الزايدة اللي بتتجمع في أنسجة جسمك اثناء الحمل . وطبيعي جدًا يكون في تورم اثناء الحمل خاصة تورم القدمين أو الكاحلين، لأن الجسم في فترة الحمل بيحتفظ بالمياه أكتر، لكن لو التورم ده زاد بطريقة مفاجئة وبشكل ملحوظ خاصة لو رجل زادت عن التانية ويصاحبها الم في الساق أو الفخد، ضروري تاخدي بالك وتستشيري الدكتور، لأن واحد من اعراض دوالي الحمل ؛ تورم في القدمين

اسباب ظهور دوالي الساقين اثناء الحمل

مع تطور مراحل الحمل وزيادة حجم الرحم، بيسبب الرحم ضغط أكبر من الطبيعي على الوريد الأجوف السفلي وهو المسئول عن نقل الدم من الأطراف السفلية للقلب، وبالتالي بيزيد الضغط في عروق الساق
ظهور دوالي الساقين اثناء الحملالعروق أو الأوردة هى الأوعية الدموية في الجسم؛ ووظيفتها إعادة الدم من الأطراف للقلب مرة تانية، معنى كدة إن الدم في عروق الساق بيمشي عكس الجاذبية. ومع الحمل بتزيد كمية الدم في الجسم، وبالتالي بيزيد العبء على العروق في إعادة كمية دم أكبر من الأطراف للرحم والقلب. كمان مع تغير الهرمونات اثناء الحمل وارتفاع مستوى هرمون البروجسترون في الجسم، واللي بدوره بيسبب توسع في الاوردة وارتخاء في جدران الأوعية الدموية.

دي اسباب ظهور دوالي الساقين اثناء الحمل والتغيرات اللي بتحصل في الجسم وبتسبب ظهور دوالي الحمل ، بس هل ده معناه إن أي حامل مُعرضة للإصابة بـ دوالي الحمل ؟؟

طبعًا مش أي حامل هيجيلها دوالي الحمل ، لكن في حالات الحامل بتكون أكتر عُرضة للإصابة بـ دوالي الحمل -خاصة دوالي الساقين منها- عن غيرها؛ زي:

  • العامل الوراثي بيلعب دور في حالة إن أشخاص تانية من العيلة تعرضت للإصابة بالدوالي.
  • أو إنها موجودة بالفعل عند الحامل من قبل فترة الحمل، ومع الحمل بتزيد زي ما شرحنا في اسباب ظهورها، ومع كل حمل بتزيد إحتمالية الإصابة بها وتضاعفها عن الحمل اللي قبله.
  • كذلك زيادة الوزن عن الطبيعي أو الحمل في توأمين، أو أي مضاعفات ممكن تسبب تضاعف الضغط على الأوردة
  • الوقوف لفترات طويلة مع مضاعفات الحمل ممكن يكون عامل زيادة في ظهور دوالي الساقين عند الحامل

 

هل دوالي الحمل تختفي بعد الولادة ؟

خلينا نقولك خبر حلو، وهو إن دوالي الحمل بتتحسن على عكس أي سبب تاني ممكن تتكون دوالي الساقين بسببه. دوالي الحمل بتميل إنها تتحسن بعد الولادة في فترة من 3 لـ 6 شهور، خاصة لو مكنش عندك دوالي الساقين قبل الحمل. ولو حصل ومتحسنتش، في علاجات كتير لدوالي الساقين تقدري تشوفي خيارات علاج دوالي الساقين المختلفة بعد ولادة طفلك بالسلامة: )

في حالات تانية ممكن تلاحظي وجود شعيرات دموية صغيرة لونها أحمر أو بنفسجي غامق بالقرب من سطح الجلد، خاصة عند الكاحل أو الساقين أو حتى في وجهك؛ ودي اسمها الدوالي العنكبوتية لأنها غالبًا بتظهر على شكل شبكة عنكبوتية، وأحيانًا بتظهر على شكل خطوط رفيعة منفصلة بدون شكل معين.
وغالبًا الدوالي العنكبوتية مش بتسبب أي إزعاج أو الم في الساق ، وعادة بتختفي بعد الولادة.

 

طرق الوقاية من دوالي الحمل

لو أنتي حامل تقدري تحمي نفسك من الإصابة بـ دوالي الساقين في الحمل ، أو على الأقل تقللي منها أثناء الحمل بالتزامك ببعض الروتين اليومي زي:

1- مارسي الرياضة بشكل يومي حتى لو كانت تمشية بسيطة كل يوم، لتحسين دورتك الدموية.

2- حافظي على وزنك ومتزيديش عن الوزن المحدد واللي بيوصيكي بيه الدكتور لمرحلة الحمل اللي أنتي فيها.
طرق الوقاية من دوالي الحمل والحفاظ على الوزن

3- حاولي ترفعي رِجليكي عن مستوى جسمك باستخدام المخدات في وقت نومك أو راحتك، لتحسين تدفق الدم في عروق الساق وبالتالي تحسين الدورة الدموية ككل.
دوالي الحمل والوقاية منها

4- متقعديش وتحطي رِجل على رِجل، ولا تشبكي القدمين في بعض، لأن ده بيعيق تدفق الدم بشكل طبيعي داخل أوردة الساقين

5- متقفيش أو تقعدي لفترات طويلة من غير حركة، وخدي وقت للتنقل ولراحة رجلك من وقت للتاني.

خطورة الدوالي اثناء الحمل

دوالي الساقين ممكن تسبب حكة، وممكن تسبب الم الساقين عند الحامل ، وممكن يكون شكلها وحش في الساقين، لكن دوالي الساقين مش بتسبب أي خطورة بشكل عام على المدى القصير. علشان كدة ممكن تأجيل علاج الدوالي بعد الولادة لو استمر وجودها.
وبالرغم من إن عادة مضاعفات دوالي الساقين نادرة، إلا إنها ممكن تتطور على المدى البعيد في حالة إهمال علاج دوالي الساقين لسنوات.
دوالي الحمل ومدى خطورتها

بالتالي ممكن تتكون جلطة الساق بالقرب من سطح الجلد عند نسبة من الأشخاص، ولأن جلطة الساق واحدة من مضاعفات دوالي الساقين اللي ممكن تسبب خطورة على المصاب بدوالي الساقين، بننصحك إنك تروحي للدكتور في حالة لو حسيتي بواحدة من اعراض جلطة الساق ؛ ومن اعراض جلطة الساق شعور بالوجع مكان جلطة الساق في الرِجل وسخونة، واحمرار في الجلد في المنطقة المحيطة.

مضاعفات دوالي الساقين


بشكل عام زي ما قولنا، مضاعفات دوالي الساقين نادرة وبتتطور في حالات الإهمال الشديدة وتجاهل علاج دوالي الساقين لسنين، بس احنا واجبنا نعرفك ايه هى مضاعفات دوالي الساقين واد ايه ممكن تبقى مؤذية لو تجاهلنا علاج دوالي الساقين
مضاعفات دوالي الساقينمن مضاعفات دوالي الساقين :

  • انتفاخ شديد في الساق
  • تكون القرح في الساق
  • تغير لون الجلد في المنطقة المحيطة بالدوالي
  • جلطة الساق
    زي ما قولنا جلطة الساق ممكن تتطور في الأوردة السطحية بالقرب من الجلد، واتكلمنا عن اعراض جلطة الساق لكن لازم نفرق بينها وبين جلطة الساق في الأوردة العميقة للساقين!
    الحمل للأسف بيزيد من احتمالية الإصابة بجلطة الساق العميقة سواء كنت تعاني من الدوالي أو لا، لكنها غير شائعة عادة. وتكمن خطورة جلطة الساق العميقة إن عدم اكتشافها بسرعة وعلاجها ممكن تنتقل للرئتين وتسبب انسداد رئوي

 

علاج الدوالي بعد الولادة

علاج الدوالي بعد الولادة بيحتاج لوقت لأن زي ما قولنا إن دوالي الحمل احتمال كبير تتحسن لوحدها من غير تدخل. في الأول يُستحسن إنك تستمري في إجراءات الوقاية زي إنك تمارسي الرياضة بانتظام، ومتقفيش ولا تقعدي فترات طويلة، وترفعي رجليكي كل ما أمكن، ده هيساعدك في إنك تحسنّي من دوالي الحمل اللي عندك، وهى غالبًا بتتحسن تمامًا في خلال من 3 لـ 4 شهور بعد الولادة
لكن للأسف في بعض الأحيان ممكن متتحسنش لوحدها وده بيحصل في حالة إن الحمل مش أول مرة وكان في حالات قبل كدة. ولو فعلًا بتسببلك الم في الساق أو أي عرض من اعراض دوالي الساقين حتى لو بتسببلك إنزعاج من شكلها، استعيني بأخصائي أوعية دموية علشان تعرفي خيارات علاج دوالي الساقين المختلفة، وطريقة العلاج المناسبة لحالتك.

الخلاصة

دوالي الحمل ممكن تكون مزعجة وتسبب لك قلق وخوف غير الوجع، بس استمرارك في المتابعة والالتزام بطرق الوقاية هيحميكي من أي خطورة، ويساعدك تتخلصي منها في أقرب وقت وبأسهل طريقة. دُمتي في صحة وسلامة: )

شاهد أيضاً

اعراض ارتفاع الضغط

قبل ما نبدا الكلام فى موضوع  اعراض ارتفاع الضغط  .. خلينى اقولك ان ضغط الدم …

مرض السكر و اسباب مرض السكر

مرض السكر ، وراثة أم عادات خاطئة ؟

قبل ما نقول إن مرض السكر وراثة، وناخد راحتنا في الأكل، لازم نعرف أنواع مرض …

طرق علاج دوالي الساقين

الدليل الكامل لـ علاج دوالي الساقين

الدليل ده هيساعدك تعرف كل حاجة عن علاج دوالي الساقين ؛ عن أصل المشكلة وحلها، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *