الإثنين , نوفمبر 19 2018
الرئيسية / خرافات الرجيم / خرافة ادوية تخسيس الجسم وحقيقتها
اضرار ادوية تخسيس الجسم

خرافة ادوية تخسيس الجسم وحقيقتها

 هل ادوية تخسيس الجسم فعالة فعلاً وبتجيب نتيجة؟ يعني ينفع تاخد دواء وتخس من غير رياضة ولا نظام غذائي؟
دول تقريبًا أهم سؤالين هنجاوب عليهم في المقالة دي، وهنجاوب كمان عن الأسئلة دي :

  • ازاي الجسم بيفقد الوزن الزائد ؟

  • ايه هى اضرار ادوية تخسيس الجسم؟

  • مشروبات للتخسيس ، فوائدها وأضرارها؟

 

ازاي ممكن نخسر الوزن الزائد ؟

احنا فاكرين ان حرق الدهون معناه إنها بتتكسر وتتحول لطاقة، أو بتخرج في صورة مياه زايدة زي مثلًا العرق! لكن في الواقع، الوزن الزايد بيخرج من الرئة على شكل ثاني اكسيد الكربون، لأن الدهون لما بتتكسر بتتحول لأكسجين وهيدروجين وكربون، اللي لو اتجمعوا سوا بيتحولوا لـ ذرات مياه وكربون دايوكسايد…
خسارة الوزن الزائد
وبالتالي 85% من الدهون اللي بيخسها الجسم، بتخرج عن طريق الرئة، والـ 15% الباقيين بتخرج عن طريق المياه؛ سواء عرق أو دخول الحمام أو حتى الدموع، والحل المعروف دايمًا لخسارة الوزن الزائد بشكل صحى هو الرياضة؛ فيدخل أكسجين كتير ويطلع ثاني أكسيد الكربون كتير، فتخس أكتر، والحل التاني انك تاكل كربون أقل!

 

خلونا نشوف بقى ادوية تخسيس الجسم بتشتغل ازاي ونقارن…

طريق التخسيس باستخدام ادوية تخسيس الجسم

ادوية تخسيس الجسم بتشتغل على أساس 3 طرق مشهورة :

 

1- منع الإحساس بالجوع (تقليل الشهية من خلال مراكز الشبع في المخ):

وده بيكون من خلال التأثير علي مراكز الجوع والشبع الموجودة في المخ، لأنها بتأثر علي المواد الكيميائية اللي بتنقل الإشارات العصبية في المخ

2- زيادة الحرق (زيادة العصبية) :

النوع دة من الأدوية بيشتغل برضو على المخ، وبيلعب على أعصاب معينة تخليك energetic أكثر، علشان بيزود سرعة نبضات القلب ويخليك تحرق أكتر.
ومن أمثلة الأدوية اللي بتسبب ده:

3- ماتتخنش (امتصاص المواد الغذائية من الجهاز الهضمي):

الأدوية دي بتشتغل على تقليل امتصاص الدهون من الأكل اللي بيدخل الجسم، لكن في المقابل الجسم مش بيمتص الفيتامينات الصحية الموجودة في الدهون، والحل البديل بيكون إن الدكتور يكتبلك ادوية فيتامينات زيادة.

طب الدهون هتخرج ازاي؟
بتخرج الدهون على هيئة براز، و ادوية التخسيس دي بتسبب اسهال (معروف بالاسهال الدهني)

ايه هى فوائد الدهون للجسم؟

  • بتحافظ على مستوى الكوليسترول في الدم.
  • بتحمي الجلد من الجفاف.
  • مصدر مهم لفيتامينات زي أ، د، هـ، ك… والدهون هي اللي بتحفز الأمعاء على امتصاص الفيتامينات دي.
  • الدهون هى مصدر الطاقة الأول للجسم
  • بتساعد الجسم على الاستفادة من الكربوهيدرات والبروتينات

أنواع الدهون 

الدهون المشبعة :

ما هى الدهون المشبعة

  • هي الدهون اللي تعتبر غير صحية، بس بما إن مفيش حاجة طبيعية غير صحية! احنا بس اللي بنخليها كدة؛ استخدامك ليها بنسبة تزيد عن 10% من كمية الأكل اليومية، ده اللي بيخليها دهون غير صحية.
  • الزيادة منها بيرفع مستوى الكوليسترول الضار في الدم، وبيكون سبب في ترسب الدهون في الشرايين.
  • الدهون المشبعة موجودة في:
    الزبدة، زيت جوز الهند، الفول السوداني، الأكل المقلي، المخبوزات، ومنتجات الألبان كاملة الدسم…

الدهون غير المشبعة :

ما هى الدهون غير المشبعة

  • الدهون غير المشبعة هى دهون صحية للجسم، لكن مهم برضه مناكلش منها زيادة عن حاجتنا لأنها هتقلب وتبقى مش صحية، لأن  أكتر من 30% من نسبة الأكل هو زيادة عن حاجة الجسم.
  • طول ما أنت محافظ على نسبتها في الأكل، ومراقب الكوليسترول مش هتكون مضرة عليك.
  • الدهون غير المشبعة موجودة في:
    زيت عباد الشمس، الأفوكادو، اللحم الأحمر، زيت الزيتون، والكتان، زيت السمك، والأسماك عمومًا خاصة السلمون، والمكسرات…


كل حاجة عن ادوية تخسيس الجسم وأضرارها

دي مش كل ادوية تخسيس الجسم لكن دول متعارف إنهم ادوية تخسيس فعالة في مصر، وأنت ممكن تبعت لنا أي دواء لو مش مكتوب هنا، واحنا هنساعدك تعرف هو بيعمل ايه بالظبط وتأثيره على الجسم.

1- اورليستات أو الزينيكال :

بيُقال إن اورليستات من افضل ادوية تخسيس الجسم اللي بتشتغل على تقليل امتصاص الدهون. لكن اتعمل على اورليستات أكتر من بحث؛ في بحث أثبت إن أي حد بيستخدم اورليستات مع اتباع نظام غذائي، وبيعمل رياضة، ممكن يخس من 2 أو 3 كيلو بس زيادة!
وفي دراسة تانية أثبتت إن بعد التوقف عن الدواء، الوزن بيزيد تاني بنسبة 35% في وقت قليل جدًا، كمان حبوب اورليستات بترفع نسبة الإصابة بأمراض الكلى حوالي 3 مرات عن الطبيعي، وده بسبب عدم امتصاص الدهون، بيحصل تراكم لمواد ضارة على الكبد والكلى.
اورليستات

 

تجربتي مع حبوب اورليستات :

دي تجربة لواحدة استخدمت اورليستات ، بتأكد على كل المعلومات اللي اتكلمنا عنها فوق، المشكلة ان كل اللي الدواء كان بيعمله إنه بينزل الدهون اللي بتدخل الجسم في النظام الغذائي -اللي مفروض عبارة أكل صحي ومن غير دهون، وبيساعد الجسم انه يخس وبيديله احتياجاته المطلوبة- تخيل بقى لما يدخل جسمك 3 أنواع فيتامينات مثلًا وبكمية محدودة والدواء يمنع امتصاصها، وفي الآخر كل اللي بيخسه الجسم زيادة هم 2 أو 3 كيلو في خلال السنة!! فطبعًا ده بيأثر على صحة الجسم كمان! وده لأن فوق قولنا فايدة الدهون ايه، تخيل الكمية الصغيرة اللي هي المفروض تكون الحاجة الاساسية في الجسم، ثلثها ميحصلوش امتصاص.

2- شيتوكال :

شيتوكال هو من الأدوية اللي ملهاش أي لازمة حتى الـ 2 أو 3 كيلو بتوع زينيكال مش بينزلهم، و شيتوكال بيتكون من مادة تسمى الـشيتوسان وهي مادة بتستخدم في الدهانات والسماد والمبيدات الحشرية!

 

شيتوكال للتخسيس

 

ما أظنش إننا محتاجين نتكلم عن الاعراض الجانبية لـ شيتوكال، كفاية المادة اللي بيتكون منها، وإن منظمة الغذاء الأمريكية رفضت الموافقة عليه، في حين إن نسبة مبيعات شيتوكال في مصر وصلت لـ 30 مليون جنيه في السنة!

3- زوتريم بلس Zotreem Plus :
زوتريم بلس

المفروض ان زوتريم مصنوع من نبات في اليونان مشهور بأنه بيساعد على التخسيس، وعلى الرغم إنه يعتبر من الادوية الطبيعية، ومش بتحتاج موافقة من الدكتور، وإن الاعراض الجانبية لـ زوتريم بلس بسيطة زي سدة النفس –وده المطلوب- وغير كدة هو بدون اعراض جانبية، إلا إن بعض الدكاترة أكدت إن زوتريم بلس له اعراض جانبية، زي الاسهال والترجيع، وكمان الجفاف، ومشاكل في المعدة، وممكن يعمل تفاعلات مع ادوية تانية، فالمريض لازم يكون حذر لو بياخد ادوية تانية.


4- ميتفورمين 
Metformin :

ميتفورمين 500

ميتفورمين ده دواء لعلاج السكر! هو بيخسس طبعًا، وفي أبحاث أثبتت إن ميتفورمين بيخسس من حوالي 5-7 كيلو، بس بسبب انه بيزود إفراز الانسولين في الجسم، وبالتالي بيهضم أكتر، لكن بيخرب السكر في جسمك في المقابل، وممكن تجيب لنفسك مرض السكر بسبب الموضوع ده!

5- كلين بترول clenbuterol :

كلين بترول من الأدوية اللي بتتاخد بكثرة جدًا في السوق المصري، والجيم للأسف بينصح بأخذه أكتر من مرة. كلين بترول من الأدوية اللي مكانتش معمولة للإنسان في الأول، كانت دواء للحيوانات، الأحصنة بالذات، وكان بيستخدم علشان يعالج أمراض الرئة في الحصان، وبعديها اتعمل عليه دراسات واستخدموه كدواء للتخسيس واشتهر بأنه “skinny pill” وله تأثير قوي جدًا.

كلين بترول بيشتغل على حرق الدهون وتحويل السعرات الحرارية اللي بتدخل الجسم يوميًا لعضلات بدل من دهون، ودي طريقة علميًا اسمها “repartitioning” . وزي أي حاجة عكس طبيعة الجسم، في تجارب كتير اتعملت على الحيوانات، وأثبتت إن كلين بترول بيتسبب في أمراض كتير، منها طبعًا أزمات قلبية للحيوانات، وفي الصين مجموعة من الناس اكلت لحم لحيوان كان متعالج بـ كلين بترول وكان سبب في أزمات قلبية، ووفيات لمجموعة الأشخاص دول.

دِول كتير منعت دخول كلين بترول لبلادهم لعلاج الحيوانات وطبعًا للبني آدمين، وفي دول مسموح بدخول الدواء لكن المدربين المحترفين عرفواا مخاطره على جسم الإنسان ومنعوا الرياضيين عندهم منه. في مصر للأسف بيحصل العكس! كتير من المدربين بيرشحوا كلين بترول على إنه دواء هايل ومالوش اي تأثير سيئ على الإنسان.

طريقة استخدام كلين بترول :
كلين باترول
لو بتاخد الدواء ولسه مصمم عليه، على الأقل الجرعة تكون من 20mg لـ125mg، و تزويد الجرعة ماينفعش يكون بمزاجك، لازم يكون تحت نصايح من متخصص، و يكون في وقت الليل، عشان يساعد العضلات على التكوين.

اعراض كلين بترول الجانبية :

زيه زي أي حبوب تخسيس بتشتغل على زيادة الحرق، بيسبب كلين بترول اعراض جانبية منها:

  • زيادة في سرعة نبضات القلب.
  • رعشة، خاصة للأيد.
  • ارتفاع ضغط الدم.
  • زيادة التوتر، والصداع.
  • زيادة العرق، وصعوبة في التنفس.

6-  افدرين Ephedrine :

  • افدرين هو في الأصل مش دواء للتخسيس ، هو دواء بيستخدم لعلاج مشاكل التنفس، وضيق الصدر وحالات الربو، وكمان هو مش من الأدوية القوية، وعلشان كدة مش بيستخدم كتير في الحالات دي، لكن للأسف منتشر كـ دواء للتخسيس !
  • افدرين من الأدوية اللي بتشتغل بطريقة اسمها علميًا Sympathomimetics وده النوع التاني اللي بيساعد الجسم على انه يحرق كتير.
  • افدرين مش من الأدوية اللي بتستخدم لمدة طويلة، ينصح دايمًا بعدم استخدامه أكتر من 7 أيام متتالية.

إفيدرين

في النهاية افدرين اتمنع من السوق، ومنظمة الأغذية والأدوية الأمريكية FDA US سنة 2014  أبدت عدم موافقتها النهائية عن الدواء، قبلها كانوا عملوا بحثين:

  • بحث سنة 1995؛ نتيجته بتقول إن 330 واحد عانوا من اعراض جانبية شديدة جدا بسبب افدرين و 12 منهم ماتوا!  
  • بحث سنة 1996؛ نتيجته كانت 800 واحد عانوا من اعراض افدرين الشديدة و 17 منهم ماتوا!علشان كده بنقول إن اضرار افدرين قوية جدًا ومش أي دكتور يوصفه، وفي بعض الحالات المرضية اللي بيتوصف فيها بيبقى بسبب رؤية الدكتور ان احتياج المريض ليه أقوى من أعراضه الجانبية.
    في مصر طبعًا بيستخدم عادي جدًا على إنه من أفضل ادوية تخسيس الجسم! وعلشان يكون افدرين فعال، بيتخلط بطريقة ما الجرعة بتاعته مع الكافيين، وأي حد بياخد الدواء ده، عارف إن تأثيره أقوى مع الكافيين.

اعراض افدرين الجانبية :

شبيه جداً من اعراض كلين بترول الجانبية ، وأقوى أعراضه اللي كانت سبب في منعه هي:

  • أزمات قلبية
  • سكتات قلبية
  • نوبات قلبية

7- الكروميوم Chromium :

الكروميوم هو حديد موجود أصلًا في جسم الإنسان، واستخدامه كدواء بيكون بكميات قليلة علشان يساعد في عمليات بتحصل جوة الجسم زي عملية الهضم. ومصادر الكروميوم بتكون من حاجات طبيعية زي الزبادي واللحمة والبطاطس والقمح وحاجات تانية كتير…
علشان كدة الكروميوم يعتبر من الفيتامينات، وفي منه أدوية، بيستخدمها الناس اللي عندها السكر، لأنه بيشتغل على نقل الجلوكوز اللي في الدم  لخلايا الجسم عشان تديها طاقة، ويحول الكربوهيدرات والدهون والبروتين لطاقة قبل ما تتخزن في الجسم.

دايمًا بيتقال إن الكروميوم هو حديد موجود في الجسم، وبالتالي مالوش أضرار، وده مش حقيقي لأن الجسم بيستخدمه بنسبة قليلة، وأصلًا هو بيكتسب النسبة القليلة دي من الأكل اليومي الطبيعي بتاع الإنسان. وده سبب استخدامهم للكروميوم كـ دواء للتخسيس ، عن طريق انه يرفع نسبة السكر في الدم ويزود حرق الدهون والكربوهيدرات والبروتين!

لكن لو الإنسان معندوش سكر -وده بيكون في أغلب الحالات- الدكاترة في الحالة دي بتأذي الجسم أكتر ما تفيده، لأنه بيلعب في نسبة السكر في دمه! ورغم إنه مكون طبيعي من جسم الإنسان، إلا إن الكروميوم له أضرار جسيمة على مدار الوقت.

الاعراض الجانبية لدواء الكروميوم :

  • بيدمر الكبد والكلى والأعصاب
  • مشاكل في المعدة وانخفاض في مستوى الدم.
  • عدم انتظام في دقات القلب

المتعارف عليه إن الاعراض الجانبية لـ الكروميوم مش منتشرة، وده حقيقي، بس ادوية تخسيس الجسم كلنا عارفين انها إدمان، ولو الدكتور وصفها لك لفترة معينة، مش هتمسك نفسك وهترجع تاخدها تاني، واخدان الكروميوم فترة أطول من اللازم أو بشكل زيادة هيتسبب في الاعراض دي بدون شك.

 

مشروبات للتخسيس

1- الشاي الأخضر Green Tea :

تقريبًا الشعب المصري كله أو العالم كمان أجمع على إن الشاي الاخضر “بيخسس” والناس بتشربه يوميًا أكتر من 5 مرات، غير حبوب الشاي الاخضر
دكتور كريستوفور أوكر بيقول: ” الشاي الاخضر من أكتر الحاجات الصحية اللي ممكن تفكر تشربها” وإن لو كل كوباية صودا استبدلناها بكوبايتين شاي اخضر ، على مدار السنة نقدر نوفر 50,000 كالوري.

فوائد الشاي الاخضر :فوائد الشاي الاخضر

  • بيحسن الدورة الدموية.
  • بيقلل الكوليسترول
  • وللمخ؛ بيمنع تكوين الخلايا اللي بتساعد على مرض الزهايمر
  • بيحافظ على توازن السكر في الدم

فوائد الشاي الاخضر للرجيم

الشاي الاخضر بيتكون من إنزيم اسمه catechins والانزيم ده بيساعد على عملية التمثيل الغذائي (metabolism) علشان كدة  بيشتغل على انه يرفع من حرق الدهون والسعرات الحرارية.


أعراض الشاي الاخضر السلبية:

  • غثيان
  • ترجيع
  • غازات
  • إسهال
  • أرق

وعمومًا الأعراض دي طبيعية جدًا لأي حاجة بتشربها بكمية كبيرة حتى لو أعشاب طبيعية.

 

طب في الآخر، الشاي الاخضر بيخسس فعلًا ولا لأ؟؟
الإجابة لأ!!
للأسف بعد أبحاث كتير، الشاي الاخضر مش بيخسس، هو بيساعد في تحسين عملية الهضم وتدفق الدم في الجسم، وبيخلي في المجمل صحة الجسم أحسن. وفي الأخر، أكيد أنت لما هتشرب شاي اخضر هتكون استبدلته بدل مشروب تاني مش مفيد في يومك الطبيعي، والشاي الاخضر مفيد في كل الأحوال، ومش بيتخن والكالوريز بتاعته قليلة جدًا.

طب هو مالوش تأثير خالص؟!
رغم إن مواقع عالمية زي Body building كاتبين إن الشاي الاخضر له تأثير سحري إلا إن تأثيره محدود جدًا، هو بيساعد على إحساس الشبع؛ بسبب إنه بيسبب غثيان للبطن، ومالوش أي تأثير في مساعدة الجسم على خسارة الوزن، لو اتشرب عادي من غير رجيم، أو رياضة.

 

أدوية الشاي الاخضر :
الشاي الاخضر

هي الحقيقة مالهاش أي فايدة وفلوس على الفاضي، تأثيرها أقوى بنسبة بسيطة عن الاعشاب الطبيعية، وفي الآخر أحسن حاجة هو عشب الشاي الأخضر الطبيعي بدون اي كيماويات.

 

 2- زنجبيل Ginger :

الـ زنجبيل من الاعشاب المعروفة عالميًا، وفي مصر، هو مش مجرد عشب بيتعمل بيه شراب الزنجبيل ، لا بنستخدمه كتوابل في أنواع كتير من أكلنا، وده شيء كويس جدًا نظرًا لـ فوائد الزنجبيل

زنجبيل

فوائد الزنجبيل :

  • بيخفف من توعكات المعدة
  • بيقلل من الغثيان
  • بيحد من احساس الترجيع
  • مفيد جدًا في حالات الغثيان الناتجة من العلاج الكيميائي
  • بيقلل من الم الدورة الشهرية

بيستخدم كعلاج قوي لآلام:

  • هشاشة العظام
  • العظام والمفاصل
  • الصداع
  • الروماتويد

و في أبحاث بس غير مؤكدة بتقول انه بيساعد في:

  • تقليل السكر في الدم
  • تقليل الكوليسترول
  • تقليل تجلطات الدم
  • تقليل احتمالية الإصابة بالزهايمر

في أكتر من كدة فوائد الزنجبيل ؟! متهيألي لأ، لأنه من أحسن الاعشاب الطبيعية. بس نيجي للنقطة المهمة…

هو الـ زنجبيل بيخسس؟

في دراسة تمت في معهد تغذية الإنسان في جامعة كولومبيا عن الـ زنجبيل وأثبتت إن الـ زنجبيل مالوش أي سعرات حرارية، وإن كتر استخدام الـ زنجبيل بيقلل الإحساس بالجوع. ففعلاً الـ زنجبيل بيساعد على التخسيس مش بيخسس.

ملحوظة مهمة جدًا:
الكمية المسموحة للـ زنجبيل يوميًا هي أقل من 5mg، أكتر من كدة هيكون مضر لأنه بيعمل سيولة في الدم، وعلشان كدة خطر جدًا على الحوامل خاصةً في الشهور الأولى من الحمل.

 

3- القرفة Cinnamon :

أي حد بيحاول يخس بيكون عامل زي الرادار لكل الحاجات اللي ممكن تكون بتخسس، فطبيعي عارف إن القرفة من الاعشاب اللي بتساعد على التخسيس ، رغم إنها مش مشهورة أوي زي الـ زنجبيل و الشاي الاخضر ، مع إن القرفة من اكتر الحاجات اللي اتعمل عليها أبحاث كانت نتايجها إيجابية الى حد ما، والدكاترة أقرت إنها فعلًا بتساعد على التخسيس

فوائد القرفة

القرفة فعلًا بتخسس؟!

في أبحاث كتير جدًا، اتعملت في موضوع القرفة وعلاقتها بالتخسيس، وعلشان نفهم رجيم القرفة ، تعالوا قبل ما نتكلم عن الأبحاث دي، نعرف معلومة مهمة عن طبيعة الجسم وازاي بيتخن؛ أول ما بناكل، ولما الجسم بيدخله كربوهيدرات كتير طول الوقت، مع أحيانًا بعض العوامل الوراثية اللي بتساعد، بيحصله حالة اسمها metabolic syndrome، ودي حالة بتحصل للجسم لما بيكون في مجموعة حالات مع بعض من زيادة الوزن وارتفاع ضغط الدم وارتفاع نسبة الكوليسترول في الدم، وبيكون نتيجتها حالة تانية هى مقاومة الانسولين!


مقاومة الانسولين بتحصل لما الكربوهيدرات تدخل المعدة، ويبدأ انزيم الهضم في تكسير الجلوكوز بسرعة في الجسم، وفي المقابل تبداء خلايا اسمها بيتا في البنكرياس تضخ الانسولين علشان يوصل لخلايا الجسم السكر اللي هي محتاجاه (احنا عارفين إن وظيفة الانسولين إنه يساعد الخلايا بإنه يوصلها السكر اللي هي محتاجاه علشان تنتج طاقة) لحد هنا طبيعي… بس بعد شوية بيحصل زي تخدير لخلايا الجسم، وتفقد احساسها بالانسولين وماتستقبلش تاني سكر منه، والخلايا ترفض استقبال الانسولين…

الانسولين بقى هو هرمون قوي جدًا، أول ما يتضخ في الدم، بيحفز الجسم على تخزين دهون، وطول ما الخلايا مش بتستقبل الانسولين ده، البنكرياس يستمر في انتاج الانسولين للتغلب على المقاومة دي…لحد ما البنكرياس يبطل يفرز الانسولين، تبدأ مستويات الجلوكوز في الدم تعلى، وبالتالي جسمك بيتحفز بطريقة قوية على إنه يخزن الدهون.
علشان كدة السمنة بترتبط غالبًا بحالة مقاومة الانسولين اللي مع استمرارها بتسبب بعد كدة مرض السكر النوع التاني لقدر الله

القرفة دورها ايه هنا بقى؟
دورها إنها بتقلل حالة الـ metabolic syndrome، ومحاولة تقليل نسبة وجود الجسم في حالة التخزين دي.

 

الأبحاث اللي بتأكد على إن القرفة بتخسس:

  • Journal medical food 2009  عملت بحث وكانت نتايجه إن القرفة فعلًا بتساعد على تقليل حالة مقاومة الانسولين وعلشان كدة في احتمالية كبيرة إن القرفة تكون بتخسس.
  • European Journal of Applied Physiology عملت تجربة على 8 مشتركين وأخدوا 3 جرام من القرفة وفي اليوم الـ 14 لقوا إن نسبة مقاومة الانسولين قلت بنسبة 27%
  • Journal of Diabetes, Obesity and Metabolism عملوا تجربة على شخصين، الاتنين أخدوا 5 جرام من القرفة؛ واحد أخده قبل التجربة على طول ونسبة مقاومة الانسولين قلت بنسبة 13% والتاني أخده قبل التجربة بـ12  ساعة ونسبة مقاومة الانسولين قلت بنسبة 10%.
  • أبحاث تانية كثير بتقول إن القرفة مش بتخسس، وده مش علشان النتايج مختلفة عن الأبحاث اللي فوق، بس هم من وجهة نظرهم شايفين إن الأرقام اللي فوق دي مش بتفيد بأي حاجة.

في الآخر، لو بصينا على وجهتين نظر اللي فوق هنعرف الفايدة من القرفة والأعشاب ككل، وإن الاعشاب ذات نفسها مش بتخسس، قد ما هى بتنظم عملية ما جوا الجسم وتساعده على إنه يهضم بشكل صحي أكتر، أو إنه يقلل نسبة تخزين الدهون في الجسم. وهو ممكن يكون عامل مفيد جدًا لما تمشي على نظام غذائي للتخسيس فعلًا. وأي كان هو مش هيضر الجسم بأي شكل من الأشكال، وبالعكس لو حتى مفادش الجسم في التخسيس هيفيدهُ على مستوى الصحة العامة.

 

وأخيرًا…

في مقولة على لسان دكتور أرثر اجتاستون بتقول ”مفيش ادوية تخسيس ليها تأثير على المدى الطويل ولا ادوية تخسيس امنة ”
ودكتور ستيفين نيسين قال: ”حتى لو في ادوية تخسيس فعالة ، أول ما توقفها هترجع تكتسب الوزن تاني، وهتواجه خطورة الأزمات القلبية”

تقريبًا مفيش دواء اتكتب فوق إلا وله اعراض جانبية مُضرة جدًا، وفي منهم اللي متوافقش عليه من منظمة الأغذية والأدوية الأمريكية. وبدل ما نخس علشان صحتنا أو شكلنا الخارجي، هنأذي حاجات تانية في الطريق معانا، علشان كده أهم جملة حقيقية؛ الجملة الشهيرة اللي سمعناها من كل الناس ”النظام الغذائي مع الرياضة وإنك تعيش حياة صحية هى الحل الوحيد”

 

*(U.S. Food and Drug Administration (FDA

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *