الإثنين , نوفمبر 19 2018
الرئيسية / خرافات طب اطفال / أشهر امراض الطفولة ” انيميا الفول “
انيميا الفول

أشهر امراض الطفولة ” انيميا الفول “

أشهر امراض الطفولة ” انيما الفول ”

ممكن فجاة كده تلاقى أبنك أو بنتك بطل أكل و بقى همدان و مش قادر يتحرك ، و وشه بقا أصفر و لون البول بتاعه اتغير و بقا داكن شوية .. تعرفى على طول انه احتمال كبير اوى يكون عنده أشهر امراض الطفولة ” انيما الفول ” .

ايه هى انيميا الفول ؟

انيميا الفول من الامراض الوراثية اللي بتيجى غالبا للذكور ( بس ممكن تيجى للبنات على فكرة بس احتمالها مش كبير ) و بتتنقل عن طريق الام التى حاملة المرض اكتر .

المرض ده ناتج خلل فى الجين المسئول عن انتاج انزيم ” سداسي فوسفات الجلوكوز النازع للهيدروجين ( Glucose-6-phosphate dehydrogenase ) و الانزيم ده بيهضم الكربوهيدرات اللي بتستهلكها كرات الدم الحمرا و كمان بيحميها من تاثير المواد المؤكسدة اللي بيكون مصدرها من بعض الاكل ، و بالتالى ممكن يحصل تُكسر لخلايا الدم لوحدها تلقائيا لو هو مش موجود ، فالبتالى مستوى الهيموجلوبين هيقل ، فبالتالى المادة الصفراء فى الجسم هتزيد عشان الكبد مش هيبقى قادر ان يصفى المادة دى بكفاءة .

ازاى الطفل بيصاب بالمرض ده ؟

انا قولت فوق انه من الامراض الوراثية يعنى بيتنقل من الام او الاب بس الام اكتر .. ركزى معايا بقا فى الحتة الوراثية اللي جاية دى عشان تعرفى من قبل ما تخلفى اذا كان فيه احتمال ان ابنك يبقى عنده أنيما الفول و بناء عليه تاخدى احتياطاتك .

معلومة قبل ما تكملى مهمة جدا و هى ان الطفل “الذكر ” بياخد من الاب الكروموسوم Y و من الام الكروموسوم × و بالتالى استحالة ان يصاب طفلك ( الذكر ) من الاب لكن ممكن من الام . و اوعى تنسى ان المرض ده بيبقى على الكروموسوم × .

1- لو كان الاب مصاب و الام حاملة للجين :

احتمال انجاب انثى مصابة = 50%
احتمال انجاب ذكر مصابة = 50%
احتمال انجاب انثى حاملة للمرض = 50% ( حاملة للمرض يعنى لا تظهر اعراض المرض عليه غالبا و لكن من المحتمل ان تنقله لولادها ) .

2- لو كان الاب غير مصاب و الام حاملة للجين :

نسبة إنجاب أنثى مصابة صفر%
نسبة إنجاب ذكر مصاب 50%
نسبة إنجاب أنثي حاملا للجين 50%

3- لو كان الاب مصاب و الام غير مصابه ولا حاملة للجين :

نسبة إنجاب أنثى مصابة صفر%
نسبة إنجاب ذكر مصاب صفر%
نسبة إنجاب أنثى حاملة للجين 100%

لازم دلوقتى تقلبي فى دفاتر العيلة و تيجبى ورقة وقلم و تشوفى احتمالية اصابة ابنك
أو بنتك بالمرض و خدى احتياطتك بقا ” هتلاقيها تحت 😀 ”

ملحوظة : المرض بيظهر اما باكل فول او بقوليات عامة او ياخد بعض الادوية ” هتلاقى كل الحاجات دى تحت 🙂 ”
أعراض المرض ايه ؟

لو انت حامل فانت اكيد دلوقتى عرفتى احتمالية اصابة ابنك بالمرض ايه و لو انت مخلفة اصلا و ابنك بيتنطط قدامك يبقى خدى بالك من الاعراض الجاية دى عشان اول ما تشوفها تبتى تتصرفى على طول 🙂

1- شحوب فى الوجه
2- صداع و دوخة
3- خمول و ضعف عام فى الجسم
4- سخونية وميل للقئ
5- ممكن يجى له الصفراء ( اكيد عارفة السبب ده لو مركزة )
6- تغيير لون البول للون غامق
7- فقدان شهية
8- عدم انتظام و ضيق فى التنفس
9- احتمال تضخم فى الطحال
10- ضعف عام فى المناعة

ايه الفحوصات اللي لازم أبنك يعملها ؟

قبل ما بتعرفى او بمعنى ادق بتشوفى اعراض المرض على ابنك فيه 4 فحوصات اساسية لازم تعمليهم :

1- تحليل البول
2- صورة دم كاملة
3- تحليل لانزيمات الكبد
4- اشعة تليفزيونية على البطن
5- Coombs’ test

العلاج ايه بقا ؟

العلاج على حسب الحالة .. فيه حالات بسيطة تلتزم بالوقاية بس و حالات تانية هتحتاج نقل دم !!
بس على العموم لازم تبعديه عن اي حاجة فيها فول ، و تديله جمض فوليك و مكملاته كتير ” هتلاقيها فى الصيدلة ” ، و لازم تاكليه الاكل اللي فيه حديد زي الكبدة مثلا و يفضل انه يستريح فى السرير .

الوقاية خير من العلاج

معروف طبعا ان الوقاية خير من العلاج عشان كده هاقولك بعض انواع الاكل تبعديها عن طفلك و كمان شوية أدوية ماياخدهاش ابدا و يستحسن الكلام ده تقوله للناس بتوع الحضانة أو المدرسة عشان طفلك يفضل فى امان .

الاغذية الممنوعة لطفل انيما الفول

1- البقوليات بجمبع انوعها و بالذات الفول و الفاصوليا و العدس .
2- اللانشون و السجق و باقى اللحوم المصنعة عشان ” احتمال ” يكون داخل فيها فول صويا
3- يستحسن تبعديه عن اي حاجة فيها الوان صناعية ” زيادة فى الاحتياط ”
4- أى اكل مش موثوق مصدره او فيه شك انه فيه حاجة مش طبيعية !!
5- بلاش فول سوادنى ولب و حمص شام كمان بعد اذنك -_-

الادوية الممنوعة لطفل انيميا الفول

1- ادوية السلفا زي sutrim , septazole and septrin
2- المسكنات وخافضات الحرارة زي aspirin

** جدول فيه كل الادوية دى

1 – sutrim , septazole and septrin
2- nalidram 500 tab
3- macrofuran , uvamine retard , mepafuran and colifuran
4-miphenicol
5-ciprofar , ciprobay
6- unibiotic ,tavaniclevoflox ,tavacin & monosho
7- peflox &pelox
8- moxacin , moxiflox
9- Primaquine & mefloquine
10- urisept & urotrim
11-celebrex
12 lasix
13- daonil , diavance &glucovance
14-lamotrine ,controlepsy &lamictal
15-pentasa & salazine
16- cidophage , glucophage
17- omnic , tamic & omnic ocas
18-acetamex & cidamex
19-Aspirin
20-Chemotherapeutic
21- Disinfectants

بالنسبة للادوية اللي ممكن تستخدم بس بحذر :

Acetaminophen
Antazoline
Ascorbic Acid
Astemizole
Colchicine
Diphenhydramine
Dopamine
Ibuprofen
Isoniazid
Lisinopril
Norfloxacin
Phenylbutazone
Phenytoin
Procainamide
Proguanil
Pyrimethamine
Quinidine
Quinine
Sulfonylurea
Isoniazid
Vit k1

فى النهاية لازم تاخدى راى الدكتور قبل ما تدى لابنك اي دوا و كمان على حسب حالته هو هيقولك على قائمة ممنوعة منعا باتا كده عشان تديها كمان للحضانة اللي فيها ابنك .

الخلاصة

مرض انيميا الفول صحيح ملوش علاج ( هو مش خطير اصلا ) بس ممكن تتجنبيه خالص لو اخدتى بالك من اكل و الادوية اللي ابنك بياخدها ، و عملتى كل الفحوصات اللازمة و سمعتى كلام الدكتور المتابع حالة ابنك . و لو انت كنتى لسه مش متزوجة يبقى لازم تروحى تعملى تحاليل انتى و جوزك المستقبلى ان شاء الله عشان تتاكدوا ان محدش فيكم عنده انيميا الفول .

شاركينا و شاركى الناس التانيه اللى بتقرأ , هل فى مرض غريب او نادر اصاب اى طفل تعرفيه ؟ شاركينا باسم المرض عشان نتكلم عنه فى مره تانيه 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *